Mjög mikilvægt er að upplýsingaflæði í neyðarþjónustu gangi hnökralaust fyrir sig.  Þegar einhver hefur samband við neyðarlínuna og óskar eftir aðstoð slökkviliðs höfuðborgarsvæðisins (SHS ) getur þurft að koma miklu magni af upplýsingum til þeirra sem eiga að sinna útkallinu. Oftast eru upplýsingar um útkallið að uppfærast á meðan SHS er á leið á útkallsstað því er mikilvægt að koma þeim jafn óðum til skila.

Börnin í undralandi tölvuleikjanna

Hagkerfi framtíðarinnar byggir á tækni og þekkingu á henni.  Í dag er þjóðfélagið háð tæknimenntuðu fólk til að nýta sér tæknina og oft á tíðum veit fólk ekki hvað er í boði.  Því þarf strax að byrja  að þjálfa upp næstu kynslóð og efla tölvufærni barna í þágu þverfaglegrar hæfni þeirra í framtíðinni.  Börnin þurfa að að læra að vinna með tölvuna en ekki bara vinna á hana – líkt og þau þurfa að læra að skrifa jafnt sem þau læra að lesa.

Upplýsingar eru verðmætustu eignir fyrirtækis í nútíma samfélagi. Það er því góð ástæða til að huga vel að öryggi þeirra. Öryggisstefnu er ætlað að verja upplýsingaeignir fyrir innri og ytri ógnunum hvort sem að þær eru af ásetningi, vegna óhappa eða af slysni og stuðla þannig að upplýsingaöryggi. Lagalegt umhverfi öryggisstefnu er nokkuð skýrt og er þá einna helst stuðst við lög nr. 77/2000 um persónuvernd og meðferð upplýsinga.

Upplýsingatækni og hagvöxtur

Fjöldinn allur er til af rannsóknum sem hafa sýnt fram á þátt upplýsingatækninnar þegar kemur að tækniframförum og afleiddri framleiðiniaukningu.  Almenn niðurstaða þessara rannsókna er að þær þjóðir sem hafa hvað mest stutt við upplýsingatækniiðnað og ýtt undir almenna notkun upplýsingatækni nýta framleiðsluþætti betur, sem þýðir aftur aukna samkeppnishæfni og meiri hagvöxt. Þrátt fyrir þessar niðurstöður hefur ekki verið mikil umræða um upplýsingatækni í þessu samhengi hér á landi hin síðustu ár. Eftir að netbólan sprakk um aldamótin og í ljós kom að væntingar um þróun netverslunar myndu ekki ganga eftir, beindist athygli fólks að öðrum atvinnugreinum. Þróunin var þó síður en svo hætt. Svo eitt dæmi sé nefnt, þá var ein af forsendum framleiðniaukningar í fjármálageiranum hin nýja tækni sem bauð upp á nýjungar eins og netbanka og kaup og sölu á verðbréfum á netinu.  En þegar hér var komið var upplýsingatæknin komin bak við tjöldin og þáttur hennar ekki eins sýnilegur og var þegar netbólan stóð sem hæst. Lítil ásókn stúlkna í tæknigreinar hérlendis.

Síðastliðin 10 ár höfum við hjá Sjá viðmótsprófunum ehf. unnið að því með viðskiptavinum okkar, fyrirtækjum og stofnunum, að þróa og framkvæma prófanir, unnið með rýnihópa og hugmyndavinnu í því skyni að bæta, skipuleggja og hanna betri vefi. Vefurinn hefur breyst mikið á aðeins þessum tíu árum og það verður æ mikilvægara fyrir fyrirtæki og stofnanir að geta svarað hinni einföldu spurningu:  Hvað vill notandinn geta gert á vefnum?

Sífellt fleiri sækja í nám á háskólastigi og á Íslandi hefur fjöldi nemenda í háskólum farið úr 2.249 nemendum árið 1977 í 19.183 nemendur árið 2010.  Fjöldi umsókna í nám í tölvunarfræði hefur fylgt þessari þróun að nokkur leyti þó að sveiflur hafi verið á milli ára og líklegast var mestur áhugi nemenda á faginu í kringum aldamótin. Aðsóknin í dag bendir þó til að áhuginn hafi aukist og sé að nálgast það sem mest var fyrir um áratug.

Forsaga

„Í upphafi var Orðið og Orðið var hjá Guði og Orðið var Guð“. Þannig byrjar Jóhannesarguðspjall Biblíunnar. Áður fyrr var upplýsingum miðlað í orðum og orð voru sannarlega mikilvæg, eins og sjá má af upphafi Jóhannesarguðspjalls. Það var ekki fyrr en að Gutenberg fann upp lausa letrið á fyrri hluta 15. aldar að nútíma prenttækni leit dagsins ljós. Oft er sagt að upphaf nútíma prentlistar markist af prentun Gutenbergs á um 120 eintökum af hinni svokölluðu „fjörutíu og tveggja línu Biblíu“. Þetta var árið 1456 og við þessa tækninýjung jukust möguleikar á að miðla upplýsingum og efla þekkingu til muna. Rúmum tveimur öldum síðar voru bækur orðnar nokkuð útbreiddur upplýsingamiðill, en þær voru bæði illa unnar og dýrar.

Oddur Benediktsson prófessor

f. 5. júní 1937
d. 17. ágúst 2010

Óttar Kjartansson
f. 7. ágúst 1930
d. 17. apríl 2010

Fyrsta íslenska fyrirtækið á því sviði atvinnulífsins sem nú nefnist upplýsingatækni var stofnað árið 1952. Heiti þess var upphaflega Skýrsluvélar ríkisins og Reykjavíkurbæjar, en síðar varð skammstöfunin Skýrr að heiti þess og vörumerki. Stofnendur voru Hagstofa Íslands f.h. Ríkisstjórnarinnar og Rafmagnsveita Reykjavíkur f.h. Reykjavíkurbæjar. Skýrsluvélar tóku við rekstri gagnavinnsluvéla sem Hagstofan hafði nýlega aflað sér ásamt samningi er Rafmagnsveitan hafði gert við IBM um leigu á vélasamstæðu. Fyrstu starfsmenn Skýrr komu frá Rafmagnsveitunni og Hagstofunni. Óttar Kjartansson kom til Skýrsluvéla frá Rafmagnsveitu Reykjavíkur þar sem hann hafi unnið frá 1948. Ekki var langt að fara því hið nýja fyrirtæki fékk inni í einu herbergi hjá Rafmagnsveitunni  í Tjarnargötu 12. Óttar starfaði hjá Skýrr í fimmtíu ár. Fjórum síðustu starfsárunum varði hann í að taka saman sögu fyrirtækisins. Kom hún út á bók árið 2002: Upplýsingaiðnaður í hálfa öld. Saga Skýrr 1952-2002, 350 blaðsíðna verk, ómetanleg heimild um upphaf vélrænnar gagnavinnslu á Íslandi.

               Baldur Jónsson, fæddur 20.01.1930, dáinn 28.06.2009

Baldur Jónsson, prófessor og málfræðingur, lést í Reykjavík 28. júní sl.
Baldur var fæddur 20. janúar 1930. Hann lauk meistaraprófi í íslenskum fræðum frá Háskóla Íslands 1958 með málfræði sem kjörsviðsgrein. Að loknu framhaldsnámi erlendis starfaði Baldur sem kennari og prófessor í íslenskri málfræði við Háskóla Íslands. Baldur var frumkvöðull í máltölvunarrannsóknum (sem nú kallast tungutækni eða máltækni) hann stjórnaði fyrstu máltölvunarrannsóknum hér á landi 1973 til 1980. Baldri var mjög umhugað um málrækt og var höfundur fjölmargra nýyrða, m.a. í flugmáli, málfræði og tölvutækni. Baldur var formaður Íslenskrar málnefndar 1978–1988. Hann beitti sér fyrir stofnun Íslenskrar málstöðvar 1985 og veitti henni forstöðu og varð málstöðin skrifstofa málnefndarinnar. Baldur var aðalhvatamaður að stofnun Málræktarsjóðs 1991. Sem formaður Íslenskrar málnefndar og forstöðumaður Íslenskrar málstöðvar hafði Baldur mikil áhrif á störf orðanefnda og beitti sér m.a. fyrir gerð Orðabanka Íslenskrar málstöðvar (sem nú er rekinn af Stofnun Árna Magnússonar í íslenskum fræðum) þar sem aðgangur er að fjölmörgum íðorðasöfnun.

Það var einmitt á vettvangi íðorðafræðinnar sem Baldur kom til liðs við Skýrslutæknifélagið. Hann settist fyrst í orðanefnd félagsins árið 1976 í tíð Jóhanns Gunnarssonar sem formanns og hefur setið í orðanefndinni óslitið síðan. Orðanefndin hefur á þeim tíma sent frá sér fjórar útgáfur Tölvuorðasafns, 1983, 1986, 1998 og 2005 og hefur fjöldi orða aukist með hverri útgáfu.
Orðanefnd Skýrslutæknifélagsins hefur það að markmiði að gera Íslendingum kleift að tala og rita um tölvutækni á góðri íslensku. Baldur lagði þar mikið til málanna. Hann tók mikinn þátt í að skipuleggja starf nefndarinnar og nefndin hafði fundaraðstöðu í Íslenskri málstöð lengst af. Málnefndin gaf út fyrstu þrjár útgáfur Tölvuorðasafnsins í ritröð sinni. Baldur lagði nefndinni til af óþrjótandi nægtabrunni þekkingar sinnar á íslensku máli. Hann áttaði sig á sköpunarkrafti málsins og aldrei var gefist upp þótt sum viðfangsefnin virtust óviðráðanleg. Tölvumálið liti töluvert öðru vísi út ef hans hefði ekki notið við. Hugkvæmni hans og smekkvísi var við brugðið og andi hans svífur yfir öllu efni sem nefndin sendi frá sér.

Baldur var gerður að heiðursfélaga Skýrslutæknifélags Íslands á aðalfundi félagsins í janúar 1997. Hann var kjörinn í Vísindafélag Íslendinga 1974 og sæmdur riddarakrossi Hinnar íslensku fálkaorðu 1991.

Félagar Baldurs í orðanefndinni, Sigrún Helgadóttir, Þorsteinn Sæmundsson og Örn Kaldalóns, sakna sárt góðs samstarfsmanns og ekki síður góðs vinar.
Við höfum nú unnið saman óslitið frá árinu 1978 aldrei hefur fallið skuggi á það góða samstarf.

Félagið sendir eftirlifandi eiginkonu Baldurs, Guðrúnu Stefánsdóttur, og öðrum ástvinum innilegar samúðarkveðjur. Blessuð sé minning Baldurs Jónssonar.

Fh Orðanefndar Ský
Sigrún Helgadóttir