Með VPN í farteskinu
Halldóra
Matthíasdóttir, markaðstjóri hjá Opnum Kerfum
Undirrituð fór í frí til Flórída í sumar, sem er
ekki í frásögur færandi nema sökum þess að samferðarmenn fengu oft á
tilfinningunni að þeir væru enn á Íslandi. Við bjuggum í heimahúsi sem hafði
ADSL tengingu og gátum þar með tengst Internetinu. Í farteskinu var fartölva og
heyrnartól með hljóðnema sem var hægt að tengja beint við tölvuna.
Þegar út var komið ákváðu ferðalangarnir að halda dagbók á netinu. Farið var á síðuna www.folk.is og opnuð ný síða en ferðalangarnir gengu undir nafninu heilaga þrenningin (The Holy Trinity). Við höfðum aldrei „bloggað” áður svo þetta var í raun skemmtileg reynsla og fjölskyldan heima á Íslandi fylgdist með okkur og leyfði okkur að fylgjast með sér, í gegnum gestabókina okkar. Þannig eigum við ennþá dagbókina okkar eftir ferðina á Internetinu.
Við höfðum ekki aðeins nóg að gera við skriftir fyrir dagbókina okkar, heldur fylgdumst við líka vel með fréttunum á Íslandi, það fór fátt fram hjá okkur. Auk þess horfðum við í Bandaríkjunum á Eurovision söngvakeppnina ekki á neinni af þeim fjölmörgu Amerísku sjónvarpsstöðvum sem við höfðum aðgang að, heldur í gegnum Netið en henni var sjónvarpað beint á vef Ríkisútvarpsins, www.ruv.is.
Einnig gat ég haldið tengslum við samstarfsfólk mitt í fríinu og
tekið mesta kúfinn af tölvupóstinum mínum, þar sem ég er með svokallaða VPN
(Virtual Private Network) tengingu. VPN býr til sýndartengingu við fyrirtækið
sem gerir það að verkum að tölvan er eins og hún sé staðsett á skrifborðinu
mínu í vinnunni, sem gefur mér aðgang að öllum gögnum, tölvupósti o.s.frv. Það sem kannski nýttist okkur best tæknilega
og fjárhagslega í þessu skemmtilega fríi, var það að geta hringt í gegnum
VPN-ið. Það virkaði með sérstökum hugbúnaði sem hafði verið settur upp á
fartölvunni minni áður en ég fór út. Því var hægt að hringja í okkur og við
gátum hringt í gegnum skiptiborð Opinna kerfa þar sem ég starfa og aðeins var
greitt innanlandsgjald fyrir símtölin. Því var slökkt á gsm-símanum alla ferðina, þökk sé nýrri tæknibyltingu.
Blaðið Tölvumál
Skil á efni
Leita í vefútgáfu Tölvumála
Um Tölvumál
Tölvumál - tímarit Skýrslutæknifélags Íslands er óháð tímarit um tölvutækni og hefur verið gefið út frá árinu 1976.
Vefútgáfa Tölvumála birtir vikulega nýja grein á vef Ský og árlega er gefið út veglegt prentað tímarit undir nafninu "Tölvumál" þar sem fjallað er um tölvutækni frá ýmsum sjónarhornum og er þema blaðsins jafnan valið snemma árs og útgáfa að hausti.
Ritnefnd Ský sér um að afla efni í Tölvumál og geta allir sem áhuga hafa sent inn efni.